
第一世噶玛巴教言集1KM12བདེ་མཆོག་ལྷ་ལྔའི་མངོན་རྟོགས་བཞུགས་སོ། །
1-2-148b
༄༅། །བདེ་མཆོག་ལྷ་ལྔའི་མངོན་རྟོགས་བཞུགས་སོ། །
༄༅། །བདེ་མཆོག་ལྷ་ལྔའི་མངོན་རྟོགས་བཞུགས་སོ། །གུ་རུ་ལ་ན་མོ། དང་པོ་བྱང་ཆུབ་མཆོག་ཏུ་ཐུགས་བསྐྱེད་དེ། སྐད་ཅིག་གིས་རང་ཧེ་རུ་ཀར་བསམ་པའི་རྙིང་གར་པཾ་ལས་པདྨ། དེའི་སྟེང་དུ་རཾ་ལས་ཉི་མ། དེའི་སྟེང་དུ་ཧཱུྃ། དེའི་འོད་ཟེར་གྱིས་བླ་མ་དང་བདེ་མཆོག་ལྷ་ལྔའི་དཀྱིལ་འཁོར་སྤྱན་དྲངས་ཏེ། ཡིད་ཀྱིས་ཕྱག་བྱ། དེ་ནས་བདག་གི་སྙིང་གའི་ཧཱུྃ་ལས་མཁའ་འགྲོ་མ། ལཱ་མ། དུམ་སྐྱེས་མ། གཟུགས་ཅན་མ་བཞིས་ཤ་ལྔ་བདུད་རྩི་ལྔ་ཐོད་པའི་ནང་དུ་ཐོགས་ཏེ། མཆོད་པར་བསམ་པ་ནང་གི་མཆོད་པའོ། །དེ་རྣམས་ཡུམ་ལ་ཐིམ་པས་བདེ་བའི་མཆོད་པ་ནི་གསང་བའོ། །ཕྱིའི་མཆོད་པ་ནི། མེ་ཏོག་མ་སེར་མོས་མེ་ཏོག་ཐོགས་པ་དང་། བདུག་སྤོས་མ་སྔོན་མོ། དྲི་ཆབ་མ་ལྗང་གུ། མར་མེ་མ་དམར་མོ། ཞལ་ཟས་མ་དཀར་མོ། རང་རང་གི་མཆོད་རྫས་འཛིན་པ་རྣམས་ཀྱིས་ཧཱུྃ་ལས་སྤྲོས་ཏེ་མཆོད་དོ། །དེ་ནས་ལུས་ངག་ཡིད་
1-2-149a
༄༅། །གསུམ་གྱིས་བྱས་པའི་སྡིག་པ་བཤགས། གཞན་གྱི་དགེ་བ་ལ་རྗེས་སུ་ཡི་རང་ལ། སངས་རྒྱས་འགའ་ཞིག་ཆོས་མི་གསུང་པ་ལ་སེམས་ཅན་ཐམས་ཅད་ཀྱི་དོན་དུ་ཆོས་ཀྱི་འཁོར་ལོ་བསྐོར་བར་བསྐུལ༑ སངས་རྒྱས་འགའ་ཞིག་མྱ་ངན་ལས་འདའ་བར་བཞེད་པ་ལ། མྱ་ངན་ལས་མི་འདའ་བར་གསོལ་བ་གདབ། དགེ་བའི་རྩ་བ་བྱང་ཆུབ་ཏུ་བསྔོ་བ་ནི། ཡན་ལག་བདུན་པའོ། །དེ་ནས་རྣལ་འབྱོར་བསྲུང་བ་ནི། སེམས་ཅན་ཐམས་ཅད་དྲིན་ཅན་ཕ་མ་རུ་བསམ། བདེ་བ་དང་ལྡན་པར་འདོད་པའི་བྱམས་པ། ངན་སོང་གསུམ་དུ་འཁྱམས་པ་རྣམས་ལ་སྙིང་རེ་རྗེ་སྙམ་པའི་སྙིང་རྗེ། དེ་སྡུག་བསྔལ་བཞིའམ། བརྒྱད་དང་བྲལ་ན་ཅི་མ་རུང་སྙམ་པའི་དགའ་བ། དེ་སེམས་ཅན་ཐམས་ཅད་ཉེ་རིང་མེད་པའི་བཏང་སྙོམས་སོ། །དེ་དག་ནི་བསོད་ནམས་ཀྱི་ཚོགས་སོ། །དེའི་རྗེས་སུ་ཆོས་ཐམས་ཅད་སྒྱུ་མ་ལྟ་བུར་བསྒོམ་ལ་སྔགས་འདི་བརྗོད་དོ། །ཨོཾ་སྭ་བྷཱ་ཝ་བི་ཤུདྡྷ་སརྦ་དྷརྨ་སྭ་བྷཱ་ཝ་ཤུདྡྷོ ྅ཧཾ། དེའི་རྗེས་ལ། ཨོཾ་ཤཱུ་ནྱ་ཏ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ ྅ཧཾ། ཞེས་ཆོས་ཐམས་ཅད་སྟོང་པ་ཉིད་དུ་བསྒོམ་པར་བྱའོ། །དེ་དག་ནི་ཡེ་ཤེས་ཀྱི་ཚོགས་སོ༑ ༑དེ་ནས་སྟོང་པ་ཉིད་ཀྱི་ངང་ལས། གཞལ་ཡས་ཁང་གྲུ་བཞི་སྒོ་བཞི་རྟ་བབས་དང་དུར་ཁྲོད་རྡོ་རྗེ་མེ་རི་དང་བཅས་པ་བསམ་མོ། །དེའི་དབུས་སུ་པཾ་ལས་པདྨ་འདབ་བཞི། དེའི་སྟེང་དུ་རཾ་ལས་ཉི་མའི་
1-2-149b
དཀྱིལ་འཁོར། དེའི་སྟེང་དུ་ཡི་གེ་ཧཱུྃ་མཐིང་ནག །དེ་ལས་འོད་འཕྲོས་པས་བགེགས་དང་ལོག་པར་འདྲེན་པ་ཐམས་ཅད་ཚར་བཅད། གཞལ་ཡས་ཁང་གི་ཕྱི་རོལ་དུ་རྡོ་རྗེའི་གུར་ཁང་དང་མེ་རབ་ཏུ་འབར་བར་བསམ༑ སངས་རྒྱས་བྱང་ཆུབ་སེམས་དཔའ་བྱིན་རླབས་དང་འོད་ཟེར་ཚུར་འདུས། ཧཱུྃ་དེ་ཡོངས་སུ་གྱུར་པ་ལས། རྡོ་རྗེ་དེའི་ལྟེ་བར་ཧཱུྃ་བསམ་པའི་འོད་ཟེར་གྱིས་ཁམས་གསུམ་གྱི་སེམས་ཅན་སྦྱངས་ཏེ་ཧེ་རུ་ཀར་གྱུར། ཚུར་འདུས་ཧཱུྃ་ལ་ཐིམ། དེ་ཉིད་ཡོངས་སུ་གྱུར་པ་ལས། བདག་ཉིད་དཔལ་ཧེ་རུ་ཀ་སྐུ་མདོག་མཐིང་ག་ཞལ་གཅིག་ཕྱག་གཉིས་པ། སྤྱན་གསུམ་པ། མཆེ་བ་གཙིགས་པ། རལ་པའི་ཐོགས་ཚུར་ཅན། ཐོད་པ་སྐམ་པོ་ལྔས་དབུ་རྒྱན་པ། རློན་པ་ལྔ་བཅུ་རྩ་གཅིག་གི་དོ་ཤལ་ཅན། དབུ་རྒྱན་དང་། སྙན་ཆ་དང་། གདུ་བུ་དང་། སྐེ་རགས་དང་། ཐལ་བ་སྟེ་ཕྱག་རྒྱ་དྲུག་གིས་བརྒྱན་པ། སྒེག་པ་ལ་སོགས་པ་གར་དགུའི་ཉམས་དང་ལྡན་པ། སྟག་གི་ལྤགས་པའི་ཤམ་ཐབས་ཅན། རྡོ་རྗེ་དང་དྲིལ་བུས་ཡུམ་ལ་འཁྱུད་ཅིང་། ཁ་ཊྭཱཾ་ག་དང་ལྡན་པའོ། །ཡུམ་རྡོ་རྗེ་རྣལ་འབྱོར་མ་སྐུ་མདོག་དམར་མོ་གྲི་གུག་དང་ཐོད་པ་བསྣམས་ཤིང་ཡབ་ལ་འཁྱུད་པའོ། །དེའི་ཕྱོགས་ཀྱི་འདབ་མ་བཞི་ལ་མཁའ་འགྲོ་མ་དང་། ལཱ་མ་དང་། དུམ་སྐྱེས་མ་དང་། གཟུགས་སྐྱེས་མ་དང་བཞི། གྲི་གུག་དང་ཐོད་པ་ཅན་ཕྱག་རྒྱ་ལྔ་དང་ལྡན་པ་བསྐྱེད་དོ། །སྐུ་
1-2-150a
༄༅། །གསུང་ཐུགས་བྱིན་གྱིས་བརླབས་པ་ནི། སྤྱི་བོར་ཟླ་བ་ལ་ཨོཾ་དཀར་པོ། མགྲིན་པར་པདྨ་ལ་ཨཱཿདམར་པོ། སྙིང་གར་སྣ་ཚོགས་རྡོ་རྗེའི་ལྟེ་བ་ལ་ཉི་མའི་སྟེང་དུ་ཧཱུྃ་སྔོན་པོའོ། །དེ་ལས་འོད་ཟེར་འཕྲོས་པས་རང་དང་འདྲ་བ་ཡེ་ཤེས་ཀྱི་འཁོར་ལོ་བཀུག་ལ་གཉིས་སུ་མེད་པར་བསྟིམ་མོ། །དབང་བསྐུར་བ་ནི། ཧཱུྃ་ལས་འོད་འཕྲོས་པས་གོང་ལྟར་སྤྱན་དྲང་ཞིང་མཆོད་ལ། ངག་ཏུ། བྱང་ཆུབ་རྡོ་རྗེ་སངས་རྒྱས་ལ། །ཅི་ལྟར་མཆོད་ཅིང་གསོལ་བ་ལྟར། །བདག་ཀྱང་དྲང་བའི་དོན་གྱི་ཕྱིར། །ནམ་མཁའི་རྡོ་རྗེ་བདག་ལ་གསོལ། །ཞེས་གསོལ་བ་བཏབ་པས། །ལྷ་མོ་བུམ་པ་ཐོགས་པ་རྣམས་ཀྱིས་དབང་བསྐུར་ཞིང་། །ཇི་ལྟར་བལྟས་པ་ཙམ་གྱིས་ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །དེ་བཞིན་དུ་ནི་ལྷ་ཡི་ཆུ། །དག་པ་ཡིས་ནི་སྐུ་ཁྲུས་གསོལ། །ཨོཾ་ཨ་བྷི་ཥིཉྩ་ཏུ་མམ། ཞེས་དབང་བསྐུར་བས་ཆུའི་ལྷག་མ་ཡར་འཁྱིལ་བས་མི་བསྐྱོད་པས་དབུ་རྒྱན་པར་བསམ། དེ་ནས་བདུད་རྩི་མྱང་པར་བྱ་སྟེ། གཏོར་མའི་སྐབས་བཞིན་ནོ། །རྫོགས་པའི་རིམ་པ་ནི། རྩ་གསུམ་འཁོར་ལོ་བཞི་གསལ་གདབ་ལ། སྤྱི་བོར་ཧཾ། མགྲིན་པར་ཨོཾ། སྙིང་གར་ཧཱུྃ། ལྟེ་བར་ཨཱཿབསམ་ལ། ཨཱཿལས་ཡེ་ཤེས་ཀྱི་མེ་སྦར་ལ། སྔར་བཀོད་པའི་ཡི་གེ་རྣམས་བསྲེགས་ལ། ཧཾ་ལས་བྱང་ཆུབ་ཀྱི་སེམས་བབ་སྟེ། རྩེ་གཅིག་ཏུ་བསྒོམ་ལ། དུ་བ་དང་། སྨིག་སྒྱུ། སྲིན་བུ་མེ་ཁྱེར་
1-2-150b
དང་༑ མར་མེ་དང་། སྤྲིན་མེད་པའི་ནམ་མཁའ་ལྟ་བུའི་ཆོས་ཉིད་མངོན་དུ་བྱའོ། །དེ་ལྟར་ཅི་ནུས་སུ་བྱ་བ་ལ་མ་གོམས་པས་སྐྱོ་བར་གྱུར་ན། དཔལ་ཧེ་རུ་ཀ་འཇའ་ཚོན་ལྟ་བུ་ལ་དམིགས་ཏེ་བཟླས་པ་བྱ་བ་ནི། དེ་ཧ་ཧ་ཧཱུྃ་ཧཱུྃ་ཕཊ། རང་གི་སྙིང་གའི་སྣ་ཚོགས་རྡོ་རྗེ་ཧཱུྃ་དང་བཅས་པ་ལས། འོད་ཟེར་རང་གི་ཞལ་ནས་ཡུམ་གྱི་ཞལ་དུ། ཡུམ་གྱི་གསང་གནས་ནས། ཡབ་ཀྱི་གསང་གནས་སུ་བཞུགས་ཏེ་ཧཱུྃ་ལ་ཐིམ་མོ། །ལྡང་བའི་ཚེ་ལྷའི་ང་རྒྱལ་དང་མི་འབྲལ་བར་བྱ་སྟེ། ཐུན་མཚམས་ཀྱི་སྤྱོད་པ་བྱའོ། །ཟས་ཟ་བའི་ཚེ་བདུད་རྩིར་བསམས་ལ་ཟ་བར་བྱའོ། །ཉལ་བའི་ཚེ་ཆོས་ཉིད་ཀྱི་ངང་ལ་ཉལ་བར་བྱའོ། །དཔལ་ཧེ་རུ་ཀའི་སྒྲུབ་ཐབས། ཨྠྀི།། །།དཔལ་བདེ་མཆོག་གི་མངོན་པར་རྟོགས་པ་ལས། ཆོས་རྗེ་རང་བྱུང་རྡོ་རྗེས་སྔར་གྱི་དེ་ལས་ཅུང་ཟད་ཙམ་བསྒྲིགས་པ་ལ་ནོར་འཁྲུལ་གྱུར་ན་བླ་མ་མཁའ་འགྲོ་ལ་བཟོད་པར་གསོལ།། །།


目录
བདེ་མཆོག་ལྷ་ལྔའི་མངོན་རྟོགས་བཞུགས་སོ། །